Tarixi
Bugungi Gabon hududi XV asrda portugallar tomonidan ochilgan. Gabonni mustamlakalashtirish jarayoni uning 1889-yilda Fransuz Kongosiga qo‘shilishi bilan yakunlandi. Gabon 1910-yilda Fransuz Ekvatorial Afrikasining tarkibiy qismiga aylandi. 1960-yildan Gabon o‘z mustaqilligiga erishdi.
Iqtisodiyoti
Yirik miqdordagi tabiiy boyliklarga ega bo‘lganligi sababli Gabon Afrikaning rivojlangan davlatlaridan biri hisoblanadi. Iqtisodiyotning yetakchi sohasi neft eksportidir. Bundan tashqari sanoatning boshqa sohalari - yog‘ochni qayta ishlash, to‘qimachilik, kon ishlari yaxshi rivojlangan. Qishloq xo‘jaligida asosan shakarqamish, kakao, banan, makkajo‘xori va sholi yetishtiriladi. Eksportga neft, marganes, toshko‘mir, uran xom-ashyosi chiqariladi. 2012-yil YIM miqdori 7,2 mlrd dollarni (aholi jon boshiga - 6000 doll.) tashkil etgan. Asosiy savdo hamkorlari Fransiya, AQSh va Yaponiya. Yirik portlari: Libervil, Port-Jantil.
